Alumni SMA 3 Gorontalo

Sebelumnya, Wan makasih so kase kesempatan for ba tulis disini.

Hallo samua, mudah-mudahan samua sehat–tantu yang ada waktu lia ini blog. Kita sebenarnya so lama skali suka baku dapa deng tamang-tamang samua. Mo bilang rindu? Iyo stou, yang pasti kayaknya rame kalu torang baku dapa ulang.

Beberapa bulan lalu–setelah 10 tahun ndak pernah pi Gorontalo–kita akhirnya pulang Gorontalo juga. Ada berapa hari libur extra–maklum budak pemerintah–jadilah kita brangkat kesana. Sampe di Gorontalo kita rupa orang dari kuampuuung skali saking kaget lia Gorontalo pe kemajuan.
Tantu yang pertama kita bekeng adalah kontak samua tamang–yang ada depe nomor kontak katu noh–kong bekeng rencana. Apa rencananya: bajalang tantu!

Singkat cerita, perjalanan berakhir pa Rie–masih inga pa Saiful Bahri Ahmad toh–pe toko. Setelah bekeng abis kopi satu gelas–cuma Ati yang minum itu, maniak kopi siang-siang soalnya–deng berbotol-botol minuman ringan–nimbole ada iklan makanya ndak pake merk–ditambah deng tatapan curiga dari Rie pe tetangga–dorang kira torang gila stou–maka pulanglah torang ke rumah masing-masing.

Dari situ kita jadi ingin mo reuni. Lantaran merasa blum lengkap deng ndak samua ada baku dapa. Jadi kita usul–awalnya pa beberapa teman–dan dorang mau.
Kita usul bagimana kalu torang reuni akbar angkatan 1991. Reuni ini bukang for mo kase tunjung seberapa berhasil torang–sesuatu yang sedang kita blum sampe disitu. Torang cuma mo baku dapa, no question about job, spouse, children and weight!

Yang mo bakumpul adalah semua yang lulus SMA Negeri 3 Gorontalo ditahun itu–tidak menutup kemungkinan rupa Koko Salimi atau Freki Haniko mau gabung, hayo.

Nah supaya lebeh matang–bae-bae jang angus–ini rencana maunya mo bekeng tahun 2011. Kenapa? Karena pada tahun itu torang 20 thn kaluar dari SMA. Yang laeng, Rie dan Vivi salah satunya, bilang talalu jaoh. Usulnya 2010 jo. Boleh juga supaya depe persiapan lebeh bagus dan pas.

Nah buat teman-teman, yang baca ini, kalo merasa angkatan 1991 kirim imel ke alamat imel ini blog (smatigagorontalo@ymail.com). Sekalian deng profil sama foto–sapa tau so ganti muka–pasti akan dimuat diblog. Jangan lupa nomor telp for mo ba hubungi akang. Itu juga sekalian buat torang pe data base alumni. Sekalian kase tau teman-teman laeng noh tentang ini rencana.

Oke, bagitu jo dulu. Torang, kita terutama, sangat berharap ini rencana akan jadi.

Salam, Lola